ਇਕ ਉਡੀਕਿਆ ਸਾਹ

ਇਕ-ਇਕ ਤੇਰਾ ਸੁਪਨਾ ਬੰਦਿਆ,
ਹਰ ਬੁਣਿਆ, ਚੁਣਿਆ ਰਾਹ;
ਕਾਮਯਾਬੀਆਂ ਦੇ ਤਗਮੇ ਸਭ,
ਹੋਰ ਜੋੜੇ ਸਮੁੰਦਰ ਅਥਾਹ;

ਤੇਰੇ ਮਾਂ-ਪਿਉ, ਤੇਰੇ ਬਾਲ-ਬੱਚੇ,
ਤੇਰਾ ਜਿਸ ਨਾਲ ਹੋਇਆ ਵਿਆਹ;

ਤੇਰੇ ਭੈਣ-ਭਰਾ, ਸਭ ਯਾਰ-ਸੱਜਣ,
ਹੋਰ ਜਿੰਨ੍ਹਾਂ ਤੇ ਰੱਖਦੈੰ ਵਿਸਾਹ;

ਬਣਾਏ ਪਹਾੜ ਜੋ ਰੇਤੇ ਦੇ,
ਬਿਨਾਂ ਸੁਣੇ ਤੂੰ ਸਿਆਣੀ ਸਲਾਹ;
ਹੋਰ ਉੱਚੇ ਕੋਠੇ, ਬਣਾਉਣ ਵੇਲੇ ਜਿਨ੍ਹਾਂ,
ਹੋ ਗਿਆ ਸੀ ਲਾਪਰਵਾਹ;

ਸੱਜੇ-ਖੱਬੇ ਦੇ ਹੋਰ ਗੁਆਂਢੀਆਂ ਲਈ,
ਤੂੰ ਵਿਸਰ ਕੇ ਸਭ ਪਰਵਾਹ,
ਹੋਰ ਜਿਸ ਵੀ ਰਹਿੰਦ-ਖੂੰਹਦ ਦਾ ਖੁਦ ਨੂੰ,
ਮੰਨ ਬੈਠਾ ਹੈਂ ਸ਼ਾਹ;

ਇਹ ਸਾਰੇ ਬਨਣਗੇ ਕਬਰਿਸਤਾਨ,
ਜਦ ਕਿਸ਼ਤੀ ਤੇਰੀ ਦਾ ਮਲਾਹ,
ਖੋਹ ਕੇ ਲੈ ਗਿਆ ਤੇਰੀ ਨਬਜ਼ ਚੋੰ,
ਇਕ ਉਡੀਕਿਆ ਸਾਹ।